
Imisebenzi Yomdanso Idlalwe Okokuqala Kwingosi Yezokuxhumana Ngobuchwepheshe
Click here for English version
Imisebenzi emine yomdanso izodlala ezinkundleni zokuxhumana ngobuchwepheshe mhla wesi-3 kuZibandlela embhidlangweni weJOMBA! Contemporary Dance Experience ne-Centre for Creative Arts.
Iphrojekthi yokuqala yangowezi-2020 ukwesekwa yi-Sustaining Theatre and Dance (iSTAND) Foundation.
Lo mkhankaso, owaziwa ngokuthi yi-Experience Choreographic Mentorship Project ye-STAND Foundation JOMBA! Contemporary Dance, udidiyela abadansi abane abasha asebeke bahlola ikhono labo lokudansa esigcawini seJOMBA! nezingqungqulu zabadansi isikhathi esingamasonto amane.
Uthisha wezobuCiko bokuLingisa noMqondisi wezoBuciko eJOMBA! uDkt Lliane Loots uthi ‘uthathwe ngumsebenzi onzima nokuzinikela kwabadansi abane abaqokiwe nalabo ababalulekayo ababaqokile, kanjalo nomsebenzi omqoka wokudansa. Sisebenza kanzima ukuba kube nohlobo lomdanso olusha oludlondlobalayo eNingizimu Afrika kanti kumqoka ukusiza amaciko ngalesi sikhathi.’
Abadansi abane abasha ngoSabelo Cele, uPavisheen Paideya, uKaldi Makutike noPhumlani Mndebele akade beqeqeshwa ngu-Alfred Hinke, u-Gregory Maqoma, uSbonakaliso Ndaba noMusa Hlatshwayo, bonke abangabadansi abahlonishwayo nabanezindondo eziningi namava amashumi eminyaka.
Ifilimu yomdano kaCele ebizwa ngokuthi Isabelo ikhuluma ngomcimbi onzima oncike ebudlelwaneni bezocansi nenjulamqondo yesiNtu. Le filimu kaCele exukuza ugebhezi ngenkolo yobuKristu e-Afrika, izoba sematheni.
U-Paideya ubuyela ezimpandeni zakhe ngomsebenzi wakhe i-Rupa esuselwe ebucikweni bemidwebo nasemasikweni esiNdiya asendulo ngokwakheka nokunyakaza komzimba. U-Paideya unekhono elingavamile lokubungaza isiko lesiNdiya kowona wonke amagumbi omhlaba kodwa futhi athi ukulishukumisa kancane; enze okungalindelekile.
I-Thoughts In My Head kaMakutike iwuhambo lomuntu olujulile olungena engqondweni yomdansi njengoba umdanso uncike ekuningeni komqondo nezinkulumo ‘esiba nazo emakhanda ethu’. Iwukubuka okuhle nokubuhlungu ukugula ngengqondo nokudangala namandla omdanso – nokwenza umculo – ukuze izinto zishintshe.
Ifilimu yomdanso kaMndebele i-Descent Into Death isuselwa kwinoveli ka-Howard Storm i-My Descent into Death exoxa ngokucishe afe nokwamehlela emhlabeni ongaziwa ngabaphilayo. Ifilimu yomdanso kaMndebele iwukubheka ukukhanya, ubumnyama nako konke okuphakathi kwakho.
USihlalo we-STAND u-Gregory Maqoma uthe: ‘Sijabule ngaloku kubambisana neJOMBA! njengoba ikhombisa ukuzinikela kwe-STAND ekungeneni ekuxhumaneni nabalingani abangabadlali bezomdanso nezeshashalazi, nombono wethu wokwakha nokweseka isizukulwane esisha sabandansi nabadlali beshashalazi abavelele.’
• Le midanso emine izodlala iyiqoqo lamahhala lemizuzu engama-40 ngehora lesi-7 kusihlwa mhla wesi-3 kuZibandlela kwi-JOMBA! YouTube Channel, kanti ingabukwa ngokuhlukana kwi-webhusayithi yeJOMBA! kuze kube wumhla we-18 kuZibandlela.
Amagama: ngu-Melissa Mungroo
Isithombe: Sithunyelwe